പുഷ്പ 2 റിലീസിനിടെ ഉണ്ടായ തിക്കിലും തിരക്കിലും സ്ത്രീ മരിക്കാനിടയായ സംഭവത്തില് നടന് അല്ലു അര്ജുനുമായി ബന്ധപ്പെട്ട വിവാദങ്ങളോട് പ്രതികരിക്കേണ്ടതില്ലെന്ന് കോണ്ഗ്രസ് നേതാക്കള്ക്ക് നിര്ദേശം നല്കി പാര്ട്ടി നേതൃത്വം. സിനിമാ വ്യവസായവും സംസ്ഥാന സര്ക്കാരും തമ്മിലുള്ള ‘അനാവശ്യസംഘര്ഷം’ ഒഴിവാക്കുന്നതിന്റെ ഭാഗമായാണ് നീക്കം. കേസ് കോടതിയില് ആണെന്നും ഇത് സംബന്ധിച്ച് കോണ്ഗ്രസ് നേതാക്കള് പൊതുപരിപാടികളിലോ മാധ്യമങ്ങളിലോ പ്രതികരിക്കരുതെന്നുമാണ് പാര്ട്ടിക്കുള്ളില് നല്കിയ നിര്ദേശം.
തെലുങ്കു സിനിമ വ്യവസായം, പുഷ്പ 2, അല്ലു അര്ജുന്, മറ്റു താരങ്ങള് എന്നിവരെക്കുറിച്ച് ആരോപണങ്ങളോ വിമര്ശനമോ വിവാദ പരാമര്ശങ്ങളോ നടക്കരുതെന്നാണ് കോണ്ഗ്രസ് തെലങ്കാന സംസ്ഥാന നേതൃത്വം നിര്ദേശം നല്കി.
ഡിസംബര് നാലിന് ഹൈദരാബാദില് ‘പുഷ്പ 2’ സിനിമയുടെ പ്രദര്ശനത്തിനിടെയുണ്ടായ തിക്കിലും തിരക്കിലും പെട്ട് ഒരു സ്ത്രീ മരിക്കുകയും മകന് ഗുരുതരമായി പരിക്കേല്ക്കുകയും ചെയ്തിരുന്നു. ദുരന്തത്തെതുടര്ന്ന് തിയേറ്റര് മാനേജ്മെന്റിനും അല്ലു അര്ജുനും സംഘത്തിനുമെതിരെ നരഹത്യയ്ക്ക് കേസെടുത്തിരുന്നു.
