കേരളം ഇന്ന് ചൂടിൽ വെന്തുരുകയാണ്. ചൂട് മൂലം സുരക്ഷാ മുന്നറിയിപ്പുകളും ഗവൺമെന്റ് ഇതിനോടകം പുറത്തിറക്കിയിട്ടുണ്ട്. കഠിന ചൂടിൽ തളരുന്ന ജനങ്ങൾക്ക് കുളിർമയേകിക്കൊണ്ട് കാലാവസ്ഥ വിഭാഗത്തിന്റെ മുന്നറിയിപ്പ്. അടുത്ത പത്ത് ദിവസത്തേക്ക് കേരളത്തിൽ മഴ ലഭിക്കും എന്നാണ് കാലാവസ്ഥ വിഭാഗം ഇപ്പോൾ പുറത്ത് വിട്ടിരിക്കുന്ന വാർത്ത. ഇന്ന് അർധരാത്രി മുതൽ സംസ്ഥാനത്തിന്റെ വിവിധ ഭാഗങ്ങളിൽ ഇടിമിന്നലോടു കൂടിയ മഴ ലഭിക്കാൻ സാധ്യതയുടെന്നാണ് പുറത്ത് വിട്ടിരിക്കുന്ന വിവരം.
നാളെ വൈകിട്ടു മുതൽ വടക്കൻ കേരളത്തിലെ കൂടുതൽ സ്ഥലങ്ങളിൽ ശക്തമായ മഴ ലഭിച്ചേക്കും. അതെ സമയം ഒറ്റപ്പെട്ട മഴയാണ് മധ്യ തെക്കൻ കേരളത്തിൽ ലഭിക്കാൻ സാധ്യത. എന്നാൽ അടുത്ത ആഴ്ച മധ്യ തെക്കൻ ജില്ലകളിലും ശക്തമായ മഴ ലഭിച്ചേക്കുമെന്നും കാലാവസ്ഥ നിരീക്ഷണ വിഭാഗം പറയുന്നു. ഇതോടെ ശക്തമായ മഴ സാധ്യത കണക്കാക്കി ഈ മാസം 9ന് മലപ്പുറം, വയനാട് ജില്ലകളിലും 10ന് ഇടുക്കി ജില്ലയിലും യെലോ അലർട്ട് പ്രഖ്യാപിച്ചു.
മേയ് 15ന് ശേഷം അറബിക്കടലിൽ ന്യൂനമർദം രൂപപ്പെടാനുള്ള സാധ്യത കൂടുതലാണെന്നും ഇപ്പോഴത്തെ സാഹചര്യത്തിൽ കേരളത്തിലേക്ക് മൺസൂൺ കൃത്യ സമയത്ത് തന്നെ ലഭിക്കുമെന്നും കഴിഞ്ഞ വര്ഷങ്ങളിലേക്കാൾ കൂടുതൽ മഴ ഈ തവണ കേരളത്തിൽ ലഭിക്കുമെന്നുമാണ് കാലാവസ്ഥ നിരീക്ഷണ വിഭാഗം പുറത്ത് വിട്ട റിപ്പോർട്ട് പറയുന്നത്.
