നാല് വിദ്യാർത്ഥിനികളുടെ മരണത്തിനിടയാക്കിയ കരിമ്പ പനയമ്പാടത്തെ ലോറി അപകടത്തിൽ പിഴവ് സമ്മതിച്ച് ഡ്രൈവർ. ലോറി ഡ്രൈവര്ക്കെതിരേ മനപ്പൂര്വമായ നരഹത്യാകുറ്റം ചുമത്തി. വഴിക്കടവ് സ്വദേശിയായ പ്രജീഷിനെതിരേയാണ് മനപ്പൂര്വമായ നരഹത്യാകുറ്റം ചുമത്തിയത്.
കരിമ്പ ഗവ. ഹയര്സെക്കന്ഡറി സ്കൂള് എട്ടാംക്ലാസ് വിദ്യാര്ഥിനികളായ കരിമ്പ ചെറൂളി പേട്ടേത്തൊടിവീട്ടില് റഫീഖിന്റെ മകള് റിദ (13), പള്ളിപ്പുറം വീട്ടില് അബ്ദുള് സലാമിന്റെ മകള് ഇര്ഫാന ഷെറിന് (13), കവുളേങ്ങല് വീട്ടില് സലീമിന്റെ മകള് നിത ഫാത്തിമ (13), അത്തിക്കല് വീട്ടില് ഷറഫുദ്ദീന്റെ മകള് അയിഷ (13) എന്നിവരാണ് മരിച്ചത്. പാലക്കാട് ജനറല് ആശുപത്രിയില് പോസ്റ്റുമോര്ട്ടത്തിന് ശേഷം ഇന്ന് രാവിലെ ആറ് മണിയോടെ വിദ്യാര്ത്ഥിനികളുടെ മൃതദേഹം അവരവരുടെ വീടുകളില് എത്തിച്ചിരുന്നു. പരിക്കേറ്റ കാസര്കോട് സ്വദേശികളായ ലോറി ഡ്രൈവര് വര്ഗീസ്(51), ക്ലീനര് മഹേന്ദ്രപ്രസാദ്(28) എന്നിവര് മണ്ണാര്ക്കാട്ടെ സ്വകാര്യ ആശുപത്രിയില് പോലീസ് നിരീക്ഷണത്തില് ചികിത്സയിലാണ്.
