സമ്പൂര്ണ ബീഫ് നിരോധനവുമായി അസം. ഇന്ന് മുതല് പൂര്ണ്ണ നിരോധനം നിലവില് വരും. മുഖ്യമന്ത്രി ഹിമന്ത ബിശ്വ ശര്മയുടേതാണ് പ്രഖ്യാപനം. ഹോട്ടലുകളിലും റസ്റ്റോറന്റുകളിലും പൊതുസ്ഥലങ്ങളിലും ബീഫ് പാടില്ലെന്നാണ് ഉത്തരവ്.
“അസമില് ഒരു റെസ്റ്റോറന്റിലും ഹോട്ടലിലും ബീഫ് വിളമ്പില്ലെന്നും പൊതു ചടങ്ങുകളിലും പൊതുസ്ഥലങ്ങളിലും ഇത് അനുവദിക്കില്ലെന്നും ഞങ്ങള് തീരുമാനിച്ചു. നേരത്തെ ക്ഷേത്രങ്ങള്ക്ക് സമീപം ബീഫ് കഴിക്കുന്നത് നിര്ത്താനായിരുന്നു ഞങ്ങളുടെ തീരുമാനം. എന്നാല് ഇപ്പോള് അത് സംസ്ഥാനം മുഴുവന് വ്യാപിപ്പിച്ചിരിക്കുകയാണ്. ഒരു കമ്മ്യൂണിറ്റിയിലോ പൊതു ഇടത്തിലോ ഹോട്ടലിലോ നിങ്ങള്ക്കിനി ബീഫ് കഴിക്കാന് കഴിയില്ല” മുഖ്യമന്ത്രി പറഞ്ഞു.
ഹിന്ദു, ജൈന, സിഖ് പുണ്യ സ്ഥലങ്ങള്ക്കും ക്ഷേത്രങ്ങള്ക്കും സമീപത്ത് പശുക്കളെ കശാപ്പുചെയ്യുന്നതും ബീഫ് വില്ക്കുന്നതും 2021ലെ അസം കന്നുകാലി സംരക്ഷണ നിയമപ്രകാരം നിരോധിച്ചിരുന്നു. മന്ത്രിസഭാ പുനസംഘടനയും ഉടനുണ്ടാകുമെന്നും മന്ത്രിസഭാ യോഗത്തിന് ശേഷം ഇന്ന് ഹിമന്ത ബിശ്വ ശര്മ പ്രഖ്യാപിച്ചു.
