Politics

2023-24 വർഷത്തിൽ ബിജെപിക്ക് സംഭാവനയായി ലഭിച്ചത് 2,244 കോടി രൂപ, കോൺഗ്രസിന് ലഭിച്ചത് 288.9 രൂപയെന്ന് റിപ്പോർട്ട്

2023-24 സാമ്പത്തിക വർഷത്തില്‍ വ്യക്തികളില്‍ നിന്നും ട്രസ്റ്റുകളില്‍ നിന്നും കോർപ്പറേറ്റ് സ്ഥാപനങ്ങളില്‍ നിന്നുമായി ബിജെപിക്ക് സംഭാവനയായി ലഭിച്ചത് 2,244 കോടി രൂപയെന്ന് റിപ്പോർട്ട്. 20,000 രൂപയും അതിന് മുകളിലുമായാണ് സംഭാവന ലഭിച്ചത്. 2022-23 ലെ സംഭാവനയുടെ മൂന്നിരട്ടിയിലധികമാണ് ഈയിനത്തിൽ കഴിഞ്ഞ വർഷം ബിജെപിക്ക് ലഭിച്ചത്. അതേസമയം, കോൺഗ്രസിന് 2023-24ൽ  288.9 കോടി രൂപയാണ് ലഭിച്ചത്. മുൻ വർഷം ഇത് 79.9 കോടി രൂപയായിരുന്നു. തെരഞ്ഞെടുപ്പ് കമ്മീഷന്റെ വെബ്സൈറ്റിലാണ് ഇക്കാര്യമുള്ളത്. പ്രൂഡൻ്റ് ഇലക്ടറൽ ട്രസ്റ്റിൽ നിന്ന് 723.6 കോടി രൂപയുടെ സംഭാവനകൾ ബിജെപിക്ക് ലഭിച്ചു.

2022-23-ല്‍ പ്രൂഡൻ്റിനുള്ള ഏറ്റവും മികച്ച സംഭാവന നല്‍കിയവരില്‍ മേഘ എഞ്ചിൻ & ഇൻഫ്രാ ലിമിറ്റഡ്, സെറം ഇൻസ്റ്റിറ്റ്യൂട്ട്, ആർസെലർ മിത്തല്‍ ഗ്രൂപ്പ്, ഭാരതി എയർടെല്‍ എന്നിവരാണ് മുന്നില്‍. അതേസമയം, ബിജെപിക്കും കോണ്‍ഗ്രസിനും ലഭിച്ച മൊത്തം സംഭാവനകളില്‍ ഇലക്ടറല്‍ ബോണ്ടുകള്‍ വഴിയുള്ള രസീതുകള്‍ ഉള്‍പ്പെടുന്നില്ല. കാരണം ഈ വിവരങ്ങള്‍ രാഷ്ട്രീയ പാർട്ടികള്‍ അവരുടെ വാർഷിക ഓഡിറ്റ് റിപ്പോർട്ടുകളില്‍ മാത്രമേ പ്രഖ്യാപിക്കൂ.

മുൻവർഷത്തെ അപേക്ഷിച്ച് 2023-24ൽ ബിജെപിക്ക് സംഭാവനകളിൽ 212% വർധനവ് രേഖപ്പെടുത്തി. 2018-19ൽ, 2019ലെ പൊതുതിരഞ്ഞെടുപ്പിനുമുമ്പുള്ള വർഷം, ബിജെപി 742 കോടി രൂപയും കോൺഗ്രസ് 146.8 കോടി രൂപയും സംഭാവന ലഭിച്ചിരുന്നു. ചില പ്രാദേശിക പാർട്ടികള്‍ അവരുടെ 2023-24 സംഭാവന റിപ്പോർട്ടുകളില്‍ ഇലക്ടറല്‍ ബോണ്ടുകള്‍ വഴി ലഭിച്ച സംഭാവന ചില പാർട്ടികള്‍ സ്വമേധയാ പ്രഖ്യാപിച്ചു. 495.5 കോടി രൂപ ബോണ്ടുകളായി ലഭിച്ചെന്ന് ബിആർഎസ് അറിയിച്ചു. ഡിഎംകെയ്ക്ക് 60 കോടിയും വൈഎസ്‌ആർ കോണ്‍ഗ്രസിന് 121.5 കോടിയും ലഭിച്ചു. ജെഎംഎമ്മിന് 11.5 കോടിയും ലഭിച്ചു.

Most Popular

To Top