കണ്ണൂര് കണ്ണപുരത്തെ ഡിവൈഎഫ്ഐ പ്രവര്ത്തകന് റിജിത്ത് വധക്കേസിൽ ശിക്ഷ വിധിച്ച് കോടതി. 19 വർഷത്തിന് ശേഷമാണ് ശിക്ഷ വിധിച്ചിരിക്കുന്നത്. തലശേരി ജില്ലാ അഡീഷണല് സെഷന്സ് കോടതിയാണ് ശിക്ഷ വിധിച്ചിരിക്കുന്നത്. പ്രതികളായ ഒൻപത് പേർക്കും ജീവപര്യന്തം ശിക്ഷ ആണ് വിധിച്ചിരിക്കുന്നത് . കേസിൽ ബിജെപി-ആർഎസ്എസ് പ്രവർത്തകരാണ് പ്രതികൾ.
19 വര്ഷം മുന്പ് നടന്ന കൊലപാതകത്തില് 10 പ്രതികളായിരുന്നു ഉണ്ടായിരുന്നത്. ബിജെപി-ആര്എസ്എസ് പ്രവര്ത്തകരായ സുധാകരന്, ജയേഷ്, ശ്രീകാന്ത്, അജീന്ദ്രന്, അനില്കുമാര്, രഞ്ജിത്ത്, രാജേഷ്, ശ്രീജിത്ത്, ഭാസ്കരന് എന്നിവരാണ് പ്രതികള്. കേസിലെ മൂന്നാം പ്രതി അജേഷ് വിചാരണ നടക്കുന്നതിനിടെ വാഹനാപകടത്തില് മരിച്ചിരുന്നു.
2005 ഒക്ടോബര് മൂന്നിനായിയിരുന്നു കൊലപാതകം. ക്ഷേത്രത്തിന് സമീപം ശാഖ നടത്തുന്നതുമായി ബന്ധപ്പെട്ട കണ്ണപുരം ചുണ്ടയില് ബിജെപി – ഡിവൈഎഫ്ഐ പ്രവര്ത്തകര് തമ്മില് തര്ക്കമുണ്ടായിരുന്നു. കൊലപാതകം നടന്നതിന്റെ തലേ ദിവസം ഇരു വിഭാഗവും തമ്മില് ഏറ്റുമുട്ടി. ഇതിന്റെ വൈരാഗ്യമാണ് കൊലപാതകത്തിലേക്ക് നയിച്ചത്.
