വയനാട് ഉരുള്പൊട്ടല് ദുരന്തത്തില് രക്ഷാപ്രവര്ത്തനത്തില് അടക്കം സര്ക്കാര് ചെലവാക്കിയ തുകയുടെ കണക്കുകള് പുറത്ത്. ഒരു മൃതദേഹം സംസ്കരിക്കാന് 75,000 രൂപയാണ് ചെലവായത്. ഇതു പ്രകാരം 359 മൃതദേഹങ്ങള് സംസ്കരിക്കാനായി 2 കോടി 76 ലക്ഷം ചെലവിട്ടു. ദുരിതാശ്വാസ ക്യാമ്പിലുള്ളവര്ക്ക് വസ്ത്രം വാങ്ങാന് 11 കോടി ചെലവിട്ടതായും സര്ക്കാര് അറിയിച്ചു.
ദുരിതാശ്വാസ പ്രവര്ത്തനങ്ങള്ക്ക് വന്ന വൊളണ്ടിയര്മാര്ക്ക് യൂസേഴ്സ് കിറ്റ് (ടോര്ച്ച്, അംബ്രല്ല, റെയിന്കോട്ട, ഗംബൂട്ട് എന്നിവ) നല്കിയ വകയില് 2 കോടി 98 ലക്ഷം രൂപ ചെലവായതായും സര്ക്കാര് വ്യക്തമാക്കുന്നു. വൊളണ്ടിയര്മാരെ ദുരന്തമേഖലയിലേക്ക് കൊണ്ടുപോകുന്നതിനായി നാലു കോടി രൂപ ചെലവഴിച്ചു. സൈനികര്ക്കും വൊളണ്ടിയര്മാര്ക്കും ഭക്ഷണത്തിനും വെള്ളത്തിനുമായി 10 കോടി ചെലവഴിച്ചുവെന്നും, ഇവരുടെ താമസത്തിനായി 15 കോടി ചെലവിട്ടതായും വ്യക്തമാക്കി .
