കൂത്തുപറമ്പ് രക്തസാക്ഷി പുഷ്പന് അന്തരിച്ചു. കൂത്തുപറമ്പ് വെടിവെയ്പിലെ ജീവിച്ചിരുന്ന രക്തസാക്ഷി എന്ന് അറിയപ്പെട്ടിരുന്ന പുഷ്പന് അന്തരിച്ചു, കഴിഞ്ഞ 30 വർഷമായി കിടപ്പിലായിരുന്നു. 54 വയസായിരുന്നു. കോഴിക്കോട് ബേബി മെമ്മോറിയല്‍ ആശുപത്രിയില്‍ മൂന്നരയോടു കൂടിയായിരുന്നു അന്ത്യം.
1994 -ൽ സ്വാശ്രയ കോളേജിനെതിരായ സമരത്തിനിടെയാണ് പുഷ്പന് വെടിയേൽക്കുന്നത്. 1994 നവംബര്‍ 25-ന് തലശ്ശേരിക്കടുത്ത് കൂത്തുപറമ്പില്‍ മന്ത്രി എംവി രാഘവനെ തടയാനെത്തിയ ഡിവൈഎഫ്‌ഐ പ്രവര്‍ത്തകര്‍ക്ക് നേരെ പോലീസ് വെടിവെപ്പ് നടത്തുകയായിരുന്നു. കൂത്തുപറമ്പിലെ അര്‍ബന്‍ സഹകരണബാങ്കിന്റെ സായാഹ്നശാഖയുടെ ഉദ്ഘാടനത്തിനെത്തിയതായിരുന്നു മന്ത്രി. അന്നത്തെ വെടിവെപ്പില്‍, വെടിയേറ്റ് ശരീരം തളര്‍ന്ന് ജീവിതകാലം മുഴുവന്‍ ശയ്യയില്‍ ആയതാണ് പുഷ്പന്.
വെടിവെപ്പിൽ അഞ്ചു പേർ മരിച്ചിരുന്നു. കെകെ രാജീവന്‍, മധു, ഷിബുലാല്‍, ബാബു, റോഷന്‍ എന്നിവര്‍ കൊല്ലപ്പെട്ടു. പ്രവർത്തകരുടെ ആവേശവും വികാരവുമായിരുന്നു. സി.പി.എമ്മിന് പകരം വയ്ക്കാന്‍ കേരളത്തിലെ പാര്‍ട്ടിക്കു പുഷ്പനെക്കാള്‍ വലിയ വൈകാരിക പ്രതീകമുണ്ടായിരുന്നില്ല.
